المجتمع داير بحال شي ESCORT GIRL

 المجتمع داير بحال شي ESCORT GIRL ،ماشي أي واحد تيعطيه لوقت ، تيعبرك من خلال اللباس ديالك أو طريقة الهضرة أو طريقة المشية أو ما يسمى ب Body Language ، عزيز عليه الزواق بزاف ، الناس البسطاء غير مثقلين عليه فارعين ليه مخو بالمطالب ديالهوم ،شي باغي السكن شي ياغي خدما ...بالنسبة ليه هاد الناس خاصهوم إتقصاو ويتفرجو من بعيد .
المجتمع عندو بزاف ديال المعايير اللي فارضهوم علينا بحال هاديك بنت الناس حيت لابسة الدرة أو هاديك خارجة على الطريق حيت ما لابساش درا ، أو هاداك شاد الطريق حيت لابس الجلابة أو عندو اللحية ..ولكين هاداك راه ما مزيانش حيت تيكمي ...واللائحة طويلة.
 المجتمع ما باغيش الناس اللي نيشان، الناس اللي صادقين، الناس الديانيين صحاب قال الله قال الرسول، الناس صحاب اﻹصلاح، داكشي علاش ما تيديهاش فيهوم أو تيخليهوم إنبحو تا يشبعو فاللخر تيلبدوها.
 المجتمع ما باغيش الناس الفقراء أو من أشهر التبريدات الي تيقول ليهوم باش ما يحسوش بالحGرة بزاف هي ؛ الفلوش ماشي هي كلشي ... ، باغي الناس لملعقين أو بجهد لهادا تيطبق واحد المبدأ الي هو إزيد إغني اﻷغنياء مقابل تفقير الفقراء والبسطاء ..المجتمع باغيك تضحك ﻷي واحد خدام معاك باش تخلص خلصة مزيانة ، باغيك تلبس الماصك ، باغيك تنافق ...والظهور كما أنت يمكن يسبب ليك مثلا فأنك تفقد الخدمة ديالك أو تبقا تشكي أو تزاوG ...المجتمع هكدا هو ... المجتمع باغيك تفاءل واخا تيسد ليك كاع البيبان ...فهاد المجتمع كاين د سلايف أند د ماستر .